पुणे प्रतिनिधी (Pune Ring Road Work) राज्य शासनाच्या महत्त्वाकांक्षी प्रकल्पांपैकी एक असलेल्या पुणे रिंगरोडचे काम गतीने सुरू आहे. मात्र, सुमारे 42 हजार कोटींचा प्रकल्पाची साधारण किंमत आहे.
पूर्व आणि पश्चिम असे रिंग रोडचे दोन भाग आहेत. सद्यःस्थितीत पश्चिम रिंगरोडचे हवेली आणि मुळशी तालुक्यात काम गतीने सुरू आहे.
मात्र काही भागात नागरिकांच्या जीवाशी खेळण्याचा देखील प्रयत्न होत आहे, मटरेल पुरवणाऱ्या ठेकेदाराकडून लोकल यंत्रणेला हाताशी धरून खडकवासला धरणाच्या परिसरात शेकडो अवजड डंपर पुणे-पानशेत रस्ता आणि एनडीए बहुली रस्ता अशा खडकवासला धरणाच्या दोन्ही बाजूंना असलेल्या मुख्य रस्त्यांवरुन ये-जा करताना दिसत आहे. धक्कादायक म्हणजे यातील बहुतांश डंपरच्या नंबरप्लेट काढून ठेवण्यात आलेल्या असून या ‘यमदूतांकडे’ वाहतूक पोलीस आणि RTO प्रशासनाचे जाणीवपूर्वक दुर्लक्ष होताना दिसत आहे.
रिंग रोडच्या कामासाठी दिवसरात्र अवजड डंपरची वर्दळ सुरू आहे मात्र अरुंद रस्त्यांमुळे इतर वाहतुकीवर त्याचा परिणाम होत असून सातत्याने लहानमोठे अपघात होत आहेत. या डंपरवरील बहुतांश चालकांकडे कागदपत्रे नाहीत, मद्यधुंद अवस्थेत असतात, सातत्याने फोनवर बोलत असतात त्यामुळे इतरांसाठी हे ‘यमदूत’ बनून रस्त्यावर धावत आहेत.
ज्या भागातून हे डंपर धावत आहेत तो भाग नांदेड सिटी, हवेली, वेल्हे, उत्तमनगर अशा चार पोलीस स्टेशनच्या हद्दीत आहे. संबंधित हद्दीतील वाहतूक पोलीस व RTO प्रशासनाने याकडे गांभीर्याने लक्ष देण्याची गरज आहे. ‘दर महिन्याच्या 10 तारखेला’ या भागात फिरणाऱ्या RTO अधिकाऱ्यांनी इतरही दिवस येण्याची आवश्यकता आहे. अशाप्रकारे नियम धाब्यावर बसवून सुरू असलेल्या अवजड वाहतूकीवर कठोर कारवाई करण्याची आवश्यकता आहे
