Pune News पुण्यातील बांधकाम व्यवसायात गुंतवणूक करून आकर्षक परतावा आणि सदनिका (फ्लॅट्स) देण्याचे आमिष दाखवून एका Dreams Corporation Fraud व्यावसायिकाची व त्यांच्या वृद्ध आईची तब्बल ८ कोटी ८१ लाख ९२ हजार २५२ रुपयांची फसवणूक केल्याचा प्रकार उघडकीस आला आहे.
आरोपींनी कायदेशीर कराराचा भंग करत गुंतवणूकदारांना सदनिका न देता हा आर्थिक गंडा घातला. याप्रकरणी चतुःशृंगी पोलीस ठाण्यात ‘ड्रीम्स कॉर्पोरेशन’च्या संचालकांसह चार भागीदारांविरोधात गुन्हा दाखल करण्यात आला असून गुन्ह्याचा तपास आर्थिक गुन्हे शाखेकडे (EOW) वर्ग करण्यात आला आहे. हा फसवणुकीचा प्रकार सप्टेंबर २००९ आणि मार्च २०१७ पासून आजतागायत सुरू होता.
रमेश घिसुलाल मेहता (संचालक – ड्रीम्स कॉर्पोरेशन), उमेश शशिकांत अंबर्डेकर (रा. बिबवेवाडी, पुणे), हंसमुख प्रकाश बांटीया (रा. मलाड ईस्ट, मुंबई) आणि हितेश सुभाष लोढा (रा. महर्षीनगर, पुणे) अशी गुन्हा दाखल झालेल्या संशयित आरोपींची नावे आहेत. याप्रकरणी राजेश शेषमल कोठारी (वय ५७, रा. अशोकनगर, शिवाजीनगर) यांनी फिर्याद दिली आहे. हा सर्व प्रकार गणेशखिंड येथील विद्यापीठ रस्त्यावरील ‘सिटी मॉल’मध्ये असलेल्या ड्रीम्स कॉर्पोरेशनच्या कार्यालयात घडला.
फिर्यादी राजेश कोठारी आणि त्यांची आई प्रेमा कोठारी यांनी आरोपी रमेश मेहता व त्याच्या इतर भागीदारांच्या वेगवेगळ्या रिअल इस्टेट आणि बांधकाम प्रकल्पांमध्ये वेळोवेळी मोठी गुंतवणूक केली होती. ही रक्कम फिर्यादींनी आरोपी रमेश मेहता याच्या जंगली महाराज रस्त्यावरील ॲक्सिस बँकेच्या वैयक्तिक खात्यात वेगवेगळ्या धनादेशांद्वारे (चेक) आणि ऑनलाईन ट्रान्सफरद्वारे जमा केली होती.
गुंतवणूक करून घेतल्यानंतर आरोपींनी कोठारी कुटुंबीयांना मोठा परतावा देण्याचे कबूल केले होते. मात्र, मुदत संपल्यानंतरही जेव्हा आरोपींना परतावा देणे शक्य झाले नाही, तेव्हा त्यांनी कोठारी कुटुंबीयांसोबत एक ‘नोटराईज एमओयू’ (सामंजस्य करार) केला. या कराराद्वारे आरोपींनी त्यांच्या वेगवेगळ्या चालू बांधकाम प्रकल्पांमध्ये घेतलेल्या गुंतवणुकीच्या मूल्याएवढ्याच रकमेच्या सदनिका देण्याचे कायदेशीररीत्या मान्य केले होते.
परंतु, कराराची मुदत संपल्यानंतरही ड्रीम्स कॉर्पोरेशनच्या संचालकांनी कोठारी कुटुंबीयांना कोणत्याही प्रकल्पात सदनिकेचा ताबा दिला नाही. कोठारी यांनी गुंतवलेले मूळ ८.८१ कोटी रुपये आणि त्यावरील ठरलेला परतावाही देण्यास आरोपींनी टाळाटाळ केली. आपली फसवणूक झाल्याचे लक्षात आल्यानंतर कोठारी यांनी पुणे शहर पोलीस आयुक्तालयात धाव घेऊन आर्थिक गुन्हे शाखेकडे दाद मागितली. प्राथमिक चौकशीनंतर चतुःशृंगी पोलीस ठाण्यात गुन्हा नोंदवण्यात आला.
गुन्ह्यातील रक्कमेचा आकडा मोठा असल्याने आणि ड्रीम्स कॉर्पोरेशनशी संबंधित मोठ्या आर्थिक घोटाळ्याचे संकेत असल्याने, वरिष्ठ अधिकाऱ्यांच्या आदेशानुसार या गुन्ह्याचा तपास आर्थिक गुन्हे शाखेच्या महिला सहाय्यक पोलीस निरीक्षक कल्याणी पाडोळे करत आहेत. आरोपींच्या बँक खात्यांचे स्टेटमेंट्स गोठवणे आणि ड्रीम्स कॉर्पोरेशनने यापूर्वी अशा प्रकारे इतरही गुंतवणूकदारांना बांधकाम प्रकल्पाच्या नावाखाली गंडा घातला आहे का, यादृष्टीने पोलीस कसून तपास करत आहेत.
